CAUAYAN CITY, Isabela – Nadadael ti dua a balay nga pinuwarkan ti improvised bomb dagiti saan pay nga ammo a suspek kabayatan nga saan nga nabettal ti maysa pay a bomba nga impurwakda iti sango ti balay ni Mayor Ruben Tegui sadiay Caliguian, Burgos, Isabela.

Immuna nga nabettak ti bomba iti balay ti staff ti mayor nga ni Alberto Camia ken ti tiendaan ti kabsatna nga ni Arnold Tegui.

Nupay awan ti nadangran ken natay iti nasao nga pasamak, dakkel ti dadael ti balay ken tiendaan kasta met nga nawara ti motorsiklo ni Camia a nakaparada iti ruar ti balayna.

Iti pannakiinnuman ti Bombo Radyo Cauayan, kinuna ni Mayor Tegui nga nu nabettak ti improvised bomb nga naibato ti sango ti balayna ket mabalin nga nawara ti ti balayna ken natayda met nga adda iti uneg.

Segun iti mayor, dagusda nga rimmuar kalpasan nga manggegda ti napigsa a kanalbuong iti balay ti staff ken kabsatna nga sangapulo a metro ti kaadayona.

Kalpasan ti 30 a minuto ket nakita ti guwardiyana ti saan a simmabog a bomba iti sanguanan ti balayna.

Kinuna met ni Sgt. Mosquito ti Explosives and Ordinance Division ti 5th Infantry Division Philippine Army nga napigsa ti bomba nu nabettak.

Segun met ken Mayor Tegui, sakbay ti nasao nga pasamak ket awan ti naaw-awatna nga pangta iti biagna. Nupay kasta, saanna a maibaga nu aramid daytoy dagiti kalaban na iti pulitika.